تورکوجه نوحه لر

محمد هوشمند

حضرت امام حسین علیه السلام

حسینین گل یوزی جنت دی والله

وجودی   خلقته   زینت دی والله

حسین  عالملره   روح و رواندی

صفای گلشن    خلقت دی  والله

حسین قانیله تفسیر ائتدی عشقی

که بیعت  ظلمیله  ذلت دی  والله

قیام ائتدی کی قران زنده  قالسین

بیزه آزاده لیق   اورگتدی والله

بو مکتبده اولان ظلمه باش ایمز

سراپا مکتبی غیرت دی  والله

حسینین نوحه سی ذکر و دعادور

عزاسی درس حیثییّت دی   والله

بو بزم عشقه هر کس یول تاپانماز

گلر بیر کیمسه کی دعوت دی والله

قرا پرچم بیزه نام   و نشاندی

قرا کوینک بیزه عزت دی  والله

بو درگهده بیری شرمنده اولماز

نه احسان اولسا بی منت دی  والله

اولور  تکراراگرهر ایل عزاسی

بیزه  برنامه  وحدت دی   والله

مریض عشقه وار دارالشفاسی

دواسی قان اولان تربت دی والله

گوزلدی هر مکاندان  کربلاسی

مزاری قبله حاجت دی والله

هاچان دعوت ائدر بس "هوشمندی"

بیلیر قلبیم دولی حسرت دی والله

منه  لطف ائیله سه آخر  نفسده

نه غم،  جان وئرماقیم راحت دی والله

التماس دعا

شاعر: هوشمند