عرض ارادت
+0 به یه ن
محبت عالمی بزم ولانین عاشیقی ام
وصال یاره گوره هر بلانین عاشیقی ام
هوای وصل هوادن چکیب کناره منی
نسیم یاریله حال و هوانین عاشیقی ام
جنون عشق آلیب صبر و تابیمی الدن
بو یولدا باشه گلن ماجرانین عاشیقی ام
عنایت اولماسا بیر کیمسه وصله یول تاپماز
گلیب اومیدله لطف و سخانین عاشیقی ام
بو آستانیده آب حیات آختاریرام
فنا یوروب منی دار بقانین عاشیقی ام
یالانچی عشقیلره من وورولمارام اصلا
جهاندا عترت خیرالورانین عاشیقی ام
خطور ائدن ده منیم ذهنمیه حدیث بکا
خلوص قلبیله بزم عزانین عاشیقی ام
آقام حسینین آدی روحیمه صفا گتیره ر
نقدری وار نفسیم کربلانین عاشیقی ام
او پاک تربتی درماندی جمله امراضه
بصیرت آلماقا خاک شفانین عاشیقی ام
جانیم فدا اولا شهزادگان تشنه لبه
شبیه جدی اولان دلربانین عاشیقی ام
بیلن شهادتی بالدان شیرین مرام اوسته
حسن نشانه سی اول باوفانین عاشیقی ام
سو ایچمی ین لب علقمده تشنه سرداری
امیر لشکر او قولسوز فدانین عاشیقی ام
ربابه سویگلی دنیانی آغلادان غمینه
علی اصعر مشکل گشانین عاشیقی ام
نماز ظهری قیلان اوخلارین هجومینده
ایله غریب قالان مقتدانین عاشیقی ام
گون اورتا چاغی چیخیب تئز باتان جفالاریلا
مدار عشقیده شمس الضحانین عاشیقی ام
او چولده قانه باتان باوفا مجاهدلر
کتاب عشقیده هر آشنانین عاشیقی ام
یازاندا شعری دئیر حسرتیله هر بندیم
شکسته نی کیمی دایم نوانین عاشیقی ام
نصیبیم اولسا اگر قتلگاهیده دئیره م
چاتام سعادته منده منانین عاشیقی ام
بیر عمریدی یانیرام دیلده ازبریمدی بوسوز
خدا نصیب ایله من کربلانین عاشیقی ام
محمد هوشمند